煲呔曾尋日喺政府總部就施政報告諮詢港區全國政協委員，最精彩嘅內容唔係六大產業或者校園驗毒，而係「最美麗港姐」朱玲玲現任同前任老公同台出現。朱玲玲日前重踏選美舞台，為新出爐港姐加冕，大家都讚佢美貌不遜當年，佢老公羅康瑞表現得相當心甜，反觀前夫霍震霆就有啲失神，令卓妮不期然諗起「桃花依舊、人面全非」呢句話。
小霍尋日下午率先開完會步出會場，大家圍住佢追問東亞運更改火炬傳送安排單嘢。點知問問吓羅康瑞喺後面閃過，部分記者立即離棄小霍改為追訪呢位新對象。
小霍羅康瑞無偈傾
大家追問羅康瑞對太太重踏選美台有乜感想，有人仲問佢會上有冇同小霍傾偈，佢就笑晒口咁話：「冇嘢講，冇嘢講。」咁係咪同小霍冇嘢講？佢都係重複嗰句：「冇嘢講，冇嘢講。」之後笑笑口上咗佢架七人車離開。
羅康瑞揚長而去後，小霍仲喺度講緊東亞運。佢一講完，大家又問佢點睇朱玲玲重返選美台嘅表現，點知佢呆咗一呆，過咗兩三秒鐘先至回過神來，然後展現招牌微笑話，自己今日係嚟講施政報告，之後就默默然轉身上車離開。
汪阿姐冇捧港姐場
縱橫電視圈數十年嘅阿姐汪明荃都有出席會議，問佢港姐質素係咪一蟹不如一蟹，阿姐就話咁講唔係幾公平，但佢自爆冇睇大前日嘅港姐決賽，無辦法評論今屆嘅佳麗質素喎。
全國政協常委、新地董事郭炳湘都有去開會，佢話今個暑假有同媽媽去旅行避暑，但唔肯講去咗邊度。卓妮又喺政府總部撞到身兼政協委員嘅前城大校長張信剛，不過佢唔係去新翼見煲呔曾，而係同另一個朋友上咗西座大樓，佢唔肯講見邊個，但預告遲啲坐低同大家傾偈。
卓妮