位於沙田嘅七十年老舖龍華酒店被政府刁難，連對開嘅行人天橋都問題多多，令街坊、遊客好唔方便。牽涉到遊客，循旅遊界當選立法會議員嘅謝偉俊（Paul）自然不敢怠慢，佢應龍華之邀去實地視察，點知竟然被市民投訴。
街坊梁小姐話前日黃昏過天橋時，見到阿Paul同白姐姐喺梯級喘緊氣，於是走埋去同阿Paul反映條橋啲梯級好高，希望可以安裝升降機方便公公婆婆。點知阿Paul只係眼定定咁望住佢，反而白姐姐就好委屈咁話：「佢唔係呢區㗎，你去搵區議員啦！」梁小姐諗住阿Paul點都會回應兩句，但無論佢叫阿Paul定尊稱一聲謝議員，阿Paul都只係一言不發咁望住佢，搞到梁小姐好似同空氣講嘢咁。
梁小姐話一直以為阿Paul好友善，點知原來一過咗放工時間就啞咗。阿Paul就同我哋講，只係一場誤會，佢一來集中精神研究緊條橋，二來成件事好九唔搭八，自己都唔知發生咩事。佢相信白姐姐都係想保護佢，同埋搵區議員都係正確指示呀。
可能阿Paul想放工後封嘴抖一抖，咁市民下次想同阿Paul申訴，即管問句「你放工未呀」。