事發喺今年四月二十四日，荃灣一間由社會福利署資助嘅安老院裏面，一名保健員涉嫌將錯誤嘅藥物餵畀院友黎婆婆。講起嚟真係險過剃頭，黎婆婆當時其實已經啪咗幾粒藥入口，好彩藥杯之中剩低幾粒，咁啱有另一名保健員見到認得出，發覺唔對路，即刻叫黎婆婆「獲藥回吐」，咁先至大吉利是冇「禍從口入」咋。

你知啦，食錯藥呢家嘢可大可小，尤其係身子孱弱嘅老人家，啪咗幾粒不知名藥丸落肚，輕則雙眼反白，重則兩腳一伸。假如公公婆婆啪到好似索Ｋ學生哥咁樣揈頭揈髻，警察上門調查以為連安老院都沉淪毒海，咁仲煩，摸着石頭過河嘅曾蔭權繼推出校園驗毒之後，可能又會傻頭傻腦諗計仔推出安老驗毒。

其實，講真，一單半單安老院派錯藥事件，而且又未吞落肚，本來都唔算係好大鑊。問題係，你以為一單半單咁少咩？根據社署資料顯示，○六至○八年間接獲一百宗懷疑安老院不當處理藥物個案，即係平均每年有三十三宗，大概十日就有一單，完全唔可以用一個少字去形容。派錯藥之所以咁頻密，原因係安老院職員未有完全按照正確程序處理藥物所致。簡單一句，粗疏大意。

好嘞，點解安老院職員會咁粗疏大意嘅呢？呢個係香港特區政府嘅老毛病，上層闊佬懶理，下層胡作非為。莫講話社署冇好好監管安老院吖，食衞局一樣冇好好監管醫院，所以醫療失誤無日無之，最近又整多劑嚇到全城猋冷汗嘅調錯嬰事件，如果你疑心重少少，你可能會質問周一嶽局長：喂，我老竇係咪親生㗎？當年醫院有冇搞錯㗎？

唉，做人難，做老人更難，做香港老人難上加難。特區政府口口聲聲話善待長者，所作所為其實係虐待長者。如果你七老八十有機會入住安老院被職員幾乎餵錯藥，你其實已經算好彩㗎喇，唔知有幾多老人家申請入住安老院，等到死都未等到咁嘅福氣。政府資助老人護養院嘅輪候時間超過三年，勞工及福利局局長張建宗前一排先至喺立法會承認，去年共有一千八百四十七名長者喺輪候期間離世。累積五年嚟計，數字仲得人驚，總共有七千六百三十八位老人家唔夠長命等落去。

其他虐老方法仲有好多，譬如話，醒你一年濕濕碎二百五十元長者醫療券，害到公公婆婆要額外貼錢睇醫生。又譬如，長者爭取增加生果金咩，曾蔭權話，得，不過要引入資產審查，激到老人家嘔血。

計功夫茶話齋，安老院舍派錯藥只係冰山一角，香港成套長者政策根本就係食錯藥！