中國人有天人合一之說，原來都唔係無道理，天文台台長李本瀅就有天氣圖觀政變嘅經驗。台長喺最新一篇《天氣圖小史》嘅網誌提到，前菲律賓總統阿基諾夫人本月一日逝世，令佢諗番廿三年前嘅一次值夜班嘅經歷，發現原來每當一個地方發生重大事故時，每每可從天氣圖看出端倪。
台長記得，一九八六年二月二十四日係菲律賓人民革命嘅前夕，身為天文台預報員嘅佢，負責分析由世界各個觀測站送來嘅地面觀測天氣圖。台長話嚟自菲律賓嘅觀測資料由午夜開始減少，到清晨更形疏落，去到翌日早上八時呢個全球氣象觀測嘅主要時間，菲律賓二十多個觀測站中，只有馬尼拉有資料顯示。
台長話當時已隱隱覺得當地局勢好嚴峻，果然，新聞報道話阿基諾夫人已經喺當日早上正式就任總統，前總統馬可斯於當晚匆忙離國，乘搭美軍直升機遠走美國，到咗廿六日，菲律賓所有觀測站都已經恢復觀測資料。唔知今次台灣南部水災、南韓前總統金大中逝世，台長有無從氣象圖中看出端倪？