校園驗毒鬧劇最近愈演愈烈，除咗決定倉卒推行計劃嘅煲呔曾需要孭鑊之外，計劃嘅始作俑者律政司司長黃仁龍亦都難辭其咎。《信報財經新聞》一個專欄尋日就指出，被傳係下任特首黑馬嘅黃仁龍最近同人講，佢唔單止唔會選特首，甚至連律政司司長都只會做埋剩低呢三年。其實如果表現唔好，下台都唔使可惜。
黃仁龍上任多年以來，隨口噏都可以數到一大堆引起社會各界爭議嘅決定。遠嘅有竊聽官司同之後嘅立法爭議，近嘅有放生喺香港打人嘅津巴布韋總統女兒保鏢、以及最近嘅校園驗毒爭議等。
黃仁龍出任青少年毒品問題專責小組主席，小組喺報告中提議嘅校園驗毒計劃，依家已經證實漏洞處處，難以執行，不但引起部分學校、教師同學生反對，本身係律師嘅私隱專員吳斌，以及兩個律師會嘅阿頭，最近更先後踢爆計劃存在好多法律問題，有可能侵犯私隱同人權，連黃仁龍佢自己前日都不得不承認計劃有不足喇。
佢作為特區政府嘅問責司長兼首席法律顧問，都預先睇唔到呢啲政治同法律問題，表現簡直可以講係唔合格。