中國香港健美總會主席涉嫌貪污，唔講唔知，原來影星任達華係呢個會嘅榮譽會長，雖然只係掛名，間唔中去頒吓獎，支持一下，但華哥聽到個會涉及貪污同埋藥檢醜聞，都講到咬牙切齒、天理不容咁話。
講開藥檢，華哥主動提到近期討論得熱烘烘嘅校園自願驗毒計劃，佢話唔明白點解咁多人反對，佢覺得驗毒係一件好事，好似驗血咁簡單，亦可以等啲小朋友明白，毒品係一定唔可以掂嘅，至於私隱問題，華哥話：「私咩隱啫？」佢話只要政府做得好啲，就唔怕畀人話侵犯私隱。
任達華同太太琦琦個女晴佳今年五歲，華哥話等第日個女大個咗，升咗上中學，都會畀佢參加驗毒計劃，果然係新一代家長，不過，晴佳有高大威猛嘅爸爸同靚媽媽琦琦愛錫，又點會濫藥呢？
華哥仲藉今次機會，呼籲時下青少年唔好濫藥，不如做多啲運動，強身健體，好似佢咁，身材都Fit啲，着件衫都靚啲啦！政府聽咗佢呢番說話，唔知會唔會搵佢做支持驗毒嘅代言人呢？