阿Paul當年都做過暑期工，喺製衣廠主要負責燙袖級工序，行內術語叫「焗雞英」，叫得做焗，部焗袖機器溫度好高，身體不停吸熱，當年住廉租屋夜晚習慣瞓地下，瞓喺涼浸浸嘅水泥地上，都感受到自己身體發熱。雖然阿Paul在製衣廠做咗短短一個月，但已相當難捱，除咗熱之外，工作環境好差，翌年暑假佢已經入咗大學，於是選擇較舒適嘅會計師樓工作。不過佢話做暑期工好重要，可以訓練年輕人刻苦耐勞。

相比阿Paul喺製衣廠做暑期工，賭王同三太陳婉珍嘅愛女超蓮就舒服得多，聽講佢喺媽咪中環間古董店學習鑑別古董，不過尋日遇到佢，佢就話自己只係普通文員，尋日我哋喺雲咸街遇到一身蒲Look嘅超蓮去食晏，佢話第一次做暑期工，感覺較想像中辛苦。