石信之（Henry）最近出咗本新書講述自己嘅前半生故事，佢自爆話早喺五歲時已對音樂產生興趣，起初就學拉小提琴，直至十五歲時爸爸帶佢去睇英國皇家交響樂團表演時，佢第一次近距離見到樂團指揮嘅動作同表情，發現指揮家嘅一舉手、一投足，都可以令成首樂章變得與別不同，從此就立志學做呢個決定樂團生死嘅靈魂人物。

港校睇死音樂教育

Henry家人見佢咁有天分同興趣，就送咗佢去外國讀音樂，當堂令佢大開眼界，並深深體會到香港嘅音樂教育真係好唔掂，年中都唔知埋沒咗幾多音樂人才，如果自己唔係有父母大力支持，佢都肯定唔會取得今日嘅成就。

Henry又透露，佢喺外國闖出名堂返港後，同好多本地學校傾過大搞音樂教育，唔少校長起初都好有興趣，但諗多兩諗就紛紛打退堂鼓，話音樂唔係香港嘅正規課程，啲學生學得幾叻都冇着數，又擔心買樂器同請教師要好多錢，教育局一定唔會批。佢又話其實政府夾夾埋埋都使咗唔少錢資助各式各樣嘅樂團，但係就好似分餅仔咁分得太散，唔係集中力量搞好一兩瓣，最後就瓣瓣都唔夠精。

對於最近講到熱烘烘嘅青少年吸毒問題，Henry話佢有位朋友喺委內瑞拉搞咗個樂團，專門吸納啲吸過毒嘅年輕人加入，令佢哋唔會無所事事周圍蒲見番啲壞朋友，即使讀唔成書都有番啲成功感，成功幫到唔少人戒毒，香港應考慮效法。Henry太太Ginny更加同我哋講，政府與其大灑金錢搞校園驗毒，不如資助佢哋同啲學校搞番幾個戒毒樂團好過，政府真係應該諗諗佢！