前自由黨副主席周梁淑怡（莎姐）休養生息近一年，最近靜極思動，為一間收費電視台出鏡做訪問節目《周梁有請》主持。九月面世前佢先改變形象，莎姐搵老友星級髮型師Kim Robinson友情贊助為佢整頭，佢電咗一頭鬈髮，自己都好滿意，話以前又直又短嘅頭髮太中性，有啲擔心同蘇施黃愈嚟愈似樣。
方剛太太供應服裝
Kim Robinson仲幫莎姐設計咗一個新風格，就係smart casual，着衫要着醒目夠潮嘅便裝，襯啲飾物就夠晒有型。髮型有Kim Robinson友情贊助，服裝方面都唔使愁，有自由黨副主席方剛嘅太太作後盾，方太嘅Episode及Jessica等名牌源源供應服裝，莎姐只要揀啱合風格嘅款式，就可以做其生招牌。
避開政治人物議題
莎姐喺政商界累積唔少人事脈絡，今次出山做主持，佢話要網羅全港最頂尖嘅人物做訪問，但就幾刻意要避開政治人物同政治議題，初步嘅目標，包括曾經為多任美國總統做西裝嘅Sam's Tailor老闆，又話最可惜Kim Robinson唔識講廣東話。
不過以佢嘅人脈關係，如果唔訪問城中兩位疑似特首候選人唐唐及梁振英，就實在太浪費。對於訪問是否成事，佢睇嚟成竹在胸，但訪問幾時進行，邊位嘅訪問先「出街」，莎姐就大賣關子嘞。
莎姐離開政壇，一啲都唔戀棧，過去一年都夠晒佢忙，除咗陪老公周明權到處旅行同對住兩個孫女，佢仲抽時間為創意香港辦公室做顧問，所以今次答應做主持，雙方並無講清楚一共拍幾多集，莎姐話，前提係呢個新角色不能佔據佢太多時間。
為咗今次改變形象，莎姐摷番佢多年來嘅舊相，檢視一下自己有幾咁百變，就連佢入無綫嘅第一個崗位做天氣女郎嘅舊照片都得以重見天日。
莎姐有一個時期留長頭髮，個樣同佢個細女周智琪，竟然出奇地相似。
卓妮