自由黨眾核心高層完成西藏集思返港後，各自各精彩。重返自由黨中委嘅前主席田北俊就高舉「休息牌」，話要抖一抖充電，皆因西藏之行受高山症困擾，行步路都慢過人；田太仲慘，有傷風在身，抖啖氣都唔多順暢。難怪田少話，西藏之行縱有老婆陪伴左右，感覺一啲都唔浪漫！
去到西藏，認真難為了田少。事關高山上空氣稀薄，田少同一眾黨友四圍逛西藏寺廟，每行半粒鐘就要停低抖番五分鐘，十足阿叔阿婆咁。西藏紫外線特別強，為免曬傷肌膚，田少每日出門例必戴定黑超外，仲狂搽防曬膏，搞到面色白雪雪，引為黨友笑柄。但講到西藏景色，田少就讚不絕口，話當地污染少，抬頭一望總係晴空萬里，令人感到心曠神怡。
唯一令佢覺得可惜嘅就係太太病倒。田太抵埗首日就傷風流鼻水，加上高山症反應，抖啖氣都有困難，好彩翌日適應番，下午可以參加集體活動。田少出名錫老婆，眼見太太身子弱，出入都扶實太座，做跟得先生，典型嘅模範夫妻！