學生索Ｋ、校本驗毒近期成為全城熱話，唔理名校定Band 3學校，都有唔少學生索Ｋ，但其實索完Ｋ後，感覺係點、有幾High有幾迷幻就唔係人人都知，立法會議員李慧琼都係一樣矇查查，佢話Ｋ仔佢就真係未索過，所以唔理解班學生哥點解會咁沉迷索Ｋ，索到不能自拔、身體受損都在所不惜。
雖然無索過Ｋ，但李慧琼都有一次High爆嘅經驗。佢話曾經試過一次患咗重感冒，食咗粒止痛藥後，成個人就暈暈哋High high哋咁，自己都唔知自己做緊啲咩，過咗無幾耐仲不省人事添，李慧琼就諗，唔通索完Ｋ個感覺就係咁上下？
李慧琼仲自爆，曾經畀人引誘索Ｋ，話說佢有個朋友喺美國返嚟，知道佢無試過索Ｋ，就同李慧琼講：「嗱！未試過就真係要試吓喇！」好彩李慧琼最後都把持得住無受引誘，先至保持到呢個清白之身。至於個校本驗毒計劃，李慧琼話佢作為家長會支持，事關毒品禍害害人不淺，但政府就要做好配套，最好一間學校有兩個社工，否則驗到一大班學生有索Ｋ卻無人跟進，咁就盞搞喇。