據了解，Raymond譚月底前會召集七位副局碰頭，以一人一票選出新班長，仲認真到實行暗票制，確保選舉公平、公正，可惜唔公開，市民無緣見證呢場選戰。

副局長去年出台無耐，政務官出身、比較熟悉政府運作嘅Raymond譚，順理成章成為副局「班長」，擔當副局與時任特首辦主任陳德霖嘅橋樑，幫手做聯繫工作，地位好似比其他七位同僚資深半級，其後接替攞命陳接掌特首辦，跑贏其他副局，自然更上一層樓。

升職踏腳石

Raymond譚今月初正式轉任特首辦主任，副局「班長」一職亦丟空咗，據聞Raymond譚打算蕭規曹隨，喺副局之中繼續行「班長制」，方便聯繫同協調一班舊戰友，而現時七名副局之中，無乜邊個特別突出，一人一票互選就最公平。為咗唔想有人受群眾壓力作出埋沒良心選擇，有損「班長」威名，仲隆重其事行暗票制度，為行政機關率先示範普選模式。由於食物及衞生局副局長梁卓偉同民政事務局副局長許曉暉正在休假，所以選舉暫定月底進行。

香港小姐互選友誼小姐，通常係最無殺傷力嘅佳麗勝出，不過，副局「班長」呢個位，Raymond譚坐完就有職升，同友誼小姐嘅安慰獎本質唔同，呢次選舉，間接透視邊位副局最易成為Raymond譚第二。

按目前形勢睇，以近期因校本驗毒計劃頻頻曝光嘅教育局副局長陳維安，同埋早排忙於應付豬流感嘅食衞局副局長梁卓偉行情最熱。陳維安雖然前排受妻子要求學校為兒子搞畢業禮事件所累，不過，最近佢為港府做前鋒，企喺前台大鑼大鼓催谷校本驗毒計劃，表現尚算平穩，令人刮目相看。至於梁卓偉，豬流感一役令佢人氣急速上升，聽聞港府內部對佢嘅評分亦唔錯，但年齡細係佢最輸蝕嘅地方，三十六歲做班長，其他比佢大十幾年嘅副局，唔知會點諗？