估唔到香港亦有咁嘅孤寒財主，諗出條「七個蓋冚十個煲」嘅絕世好橋。邊個咁醒目？原來又係消防處。資源唔夠唔向政府據理力爭，佢哋居然攤薄嚟用，話之你死人冧樓，call白車call到爆。

有青衣區居民揭發，話聽講青衣救護站部分白車同人手會被調去其他救護站，救護員擔心資源不足，日後冇覺好瞓。有當區區議員話，長者佔青衣人口一成，白車使用比率較高，當局削減救護資源連區議會都冇諮詢，減咗至算，第日唔止影響救護員士氣，居民有起事來可能因為冇白車到而失救。

有冇搞錯？當然冇。連消防處救護員組織都話，早就聽講青衣救護站有部分資源可能會調去就快開檔嘅美孚新站，類似做法其實幾年前亦試過。喺其他地方調車去新站，無非係想盤數睇落靚啲。其實呢種自欺欺人嘅「內部調撥」，已經令好多救護站嘅資源買少見少。不過，消防處對救護資源不足畀人踢爆並冇正式回應，淨係打官腔，話「一般情況下」，調配資源嘅安排唔會影響緊急救護服務同編更制度。

功夫茶冇聽錯吖嘛？唔該消防處班高官用吓個腦啦，白車救人唔係玩魔術，可以「無中生有」，變嚟變去，變多變少。有幾多資源就做到幾多嘢，就係咁簡單！顧此就難免失彼，有乜理由救護站嘅資源明明被分薄咗去第二度，服務都唔受影響㗎？

話時話，本港白車服務水準係點，市民有眼睇啦。依家嘅車隊大部分係幾乎夠資格入博物館嘅老爺車，平均一、兩個禮拜梗會跪低一到兩架，病人即使等到白車嚟，都唔等於有得救，如果送院途中跪多次，條命分分鐘凍過水。

今年三月底，一名四十歲男子喺石硤尾白田邨寓所昏迷，一架超過十年車齡嘅頂更白車到場施救，送院途中出現故障，延誤八分鐘至由另一架白車送院，延至第二日不治。

有救護員組織早喺五年前已提醒政府正視問題，促請盡快買新車，但當局一直闊佬懶理，直至爆出多宗白車延誤事故，至撥款增購二百幾架白車補鑊。政府吹水話，到時白車平均車齡會由依家嘅八年左右，下降至一年多啲。

吹多無謂，即刻增加資源最實際。本港人口老化，市民對白車服務嘅需求不斷增加，等呢兩百架白車到齊，睇怕都仲係掹掹緊。咪畀功夫茶批中，到時政府呢個孤寒財主只能夠再學「阿福煲粥」，玩「冚蓋魔術」，將資源一拆二甚至更多，移形換影，攞市民條命嚟較飛。