廠商會年底換屆，會長爭奪戰進入白熱化，前廠商會立法會議員呂明華前日喺公開場合揭黃友嘉私隱，暗指其年前曾入院「維修」，身體麻麻哋，此言一出，引來廠商會議論紛紛，當事人黃友嘉尋日凌晨越洋致電返港澄清，話自己身體狀況良好，參選會長絕無問題，仲反擊呂明華爆其私隱「好無必要」！
身在美國公幹嘅黃友嘉一聽見有記者查問佢嘅健康狀況，越洋都「飛」個電話嚟澄清，平日沉默寡言嘅佢喺長途電話中談及病情，黃友嘉起初以「私人嘢」為由，唔想講太多；但最終承認曾入院，但因乜病住院就唔講嘞。佢又強調從冇刻意隱瞞病情：「我有同廠商會會董提過自己入院，但無諗過呢啲私人嘢竟然會畀人攞出嚟講。」
對於呂明華公開其患病私隱，黃友嘉不以為然話：「我今年五十幾歲，入過醫院有乜咁奇！呢啲事毋須大驚小怪，更加無必要因為選舉公開人哋嘅私隱。」佢暗寸呂明華話：「選舉應該係講功績，幫個會有更大貢獻仲好喇！」黃友嘉反擊起嚟中氣十足，話佢身體唔多妥，睇怕都無人信。