天主教香港教區傳播處主任容若愚日前以個人身份建議各界齊齊參與驗毒計劃，教育局副局長陳維安在電台節目上話願意接受驗毒，但就暗寸有關建議浪費社會資源，就算驗都會自願承擔費用。事隔兩日，保安局局長李少光尋日都附和，話建議流於做騷，相信提議者只係一時發晦氣；如果有人覺得佢哋高官高高在上，他亦願意帶頭驗毒。
校本驗毒試行計劃惹起咁大爭議，光哥就話有爭議係好正常，但他相信最終會得到大部分市民認同，事關青少年吸毒風氣不可助長，一定要有措施遏制這種歪風。驗毒計劃落得如斯田地，五名問責局長和擔大旗嘅司長奉旨出席電台節目為計劃解畫，好似光哥尋日就上去講執法，其他高官下星期都會排隊上去，勞工及福利局局長張建宗就講輔導工作，教育局副局長陳維安講教育，食物及衞生局局長就講醫療範疇，民政事務局局長就講地區配合和支援。