行政會議召集人梁振英（CY）自從傳出佢有意參選下屆特首後，日日都有新搞作，頻頻出席公開活動兼接受各界專訪。CY早前接受半島青年商會刊物《快箭》嘅訪問，大談時下青少年「索Ｋ」以至「G模」熱潮等社會現象。
CY話，每一代青少年都有自己嘅問題，而「索Ｋ」同「G模」就係新一代青少年嘅問題，所以社會無必要將呢啲問題無限放大，更加唔應該得出青年人「一蟹不如一蟹」嘅結論。
香港成日以國際金融中心自居，但CY就毫不客氣批評，話香港人好多時誤以為有外國權威雜誌將倫敦、紐約同香港放埋一齊，就當正自己真係國際金融中心，事實上，香港所謂嘅金融中心，只得灣仔到中環嗰少少地方。佢話，回歸前由於各種制度同文化嘅差異，令港人好抗拒前往內地，加上機票動輒幾千元一張，所以除咗商人之外，一般港人都好似「小皇帝」咁，甚少出國，結果就變成夜郎自大。佢鼓勵青年人爭取多啲出國機會，擴闊眼界。
半島青年商會之前都訪問過唔少名人，好似海洋公園主席盛智文就係上一期嘅專訪對象。會長馬家強話，今次同CY做完訪問，直頭係「當頭棒喝」，令佢反思過去因循嘅思想同處事方法。