漳州近年成為福建新興發展城市之一，吸引唔少外商投資。楊孫西話，佢都喺漳州投資發展房地產，地盤面積有成一百萬平方米，足夠起幾十幢樓房，近日已動工。呢次投資金額有幾大，楊生就保持神秘，唔講嘞。佢分析話，漳州鄰近廈門，地理位置極佳，自從海峽兩岸關係改善後，多咗台灣人去漳州投資工業及農業，包括種水果、種花等，唔少台灣人本來就原籍漳州，眼見中國市場潛力無限，都返內地分一杯羹喎。

楊孫西又話，漳州近年興建高速鐵路連接福州、廈門、漳州等，直達深圳，預計兩年後落成，所以唔少港商都喺漳州「插旗」喎。楊生咁落力推介，睇怕應該封佢為「漳州投資大使」嘞。不過講到香港樓市及股市，楊孫西就話冇沾手，即使近日樓股齊飛，仍未吸引到佢入市，佢笑言精力有限，僅睇住江蘇及北京嘅投資項目已分身不暇，邊有時間分神炒股喎！