副局政助係特區官場新事物，港府高層特設兩名高級看護照料，一個係政制及內地事務局局長林瑞麟，負責睇實架構制度，一個係特首辦主任，幫手統籌、監督副局政助落實中央柯打嘅情況，好似分工落區呢場大龍鳳，就係一例，據悉亦係唯一孤例，不過，一樣做到虎頭蛇尾，令人搖頭嘆息。

地區消息透露，副局落區，雷聲大、雨點小，推行之初，都識約區議員飲茶傾偈打哈哈，但日子一久，就人人失憶，唔記得計劃嘅本義係探民情，聽民意，最活生生例子，就係校本驗毒風波。

政府去年底已發表青少年吸毒問題專責小組報告，提出探討校本驗毒計劃，但一直只聞樓梯響。直至正生書院遷校風波再次觸發各界關注青少年吸毒問題，煲呔曾先至急就章在上月立法會答問大會上宣布全民抗毒，並在大埔區試行校本驗毒計劃，點知愈急愈亂，一亂就出錯，不但遭辦學團體批評，連作為私隱專員吳斌亦發炮未被諮詢。

校本驗毒計劃引發四面楚歌，明顯諮詢不足，令人不解嘅係，煲呔曾點解無下令班副局長落區摸底，尋找最少爭議嘅地區作為驗毒試點？班副局個個自詡政府精英，點解又無人主動幫中央收風索料？有地區人士估計，政府揀選大埔做試點，可能與教育局副局長陳維安負責大埔區有關，反而支持驗毒計劃嘅觀塘及北區無被選中做試點。

同區會溝通有問題

究竟一班副局長落區做過乜呢？深水埗區議會副主席譚國橋話，負責該區嘅食衞局副局長梁卓偉只係落區討論豬流感問題，並無關注其他議題。屯門區議員陳雲生亦話，環境局副局長潘潔到過區會諮詢在屯門區設立焚化爐意見，但完全不知道她是負責屯門區，睇怕其他副局分工落區嘅成績表，都唔好得去邊！副局政助制度本身係特區畸形政治生態下嘅怪胎，未來係龍係蛇，就靠副局各人嘅努力與修為，以及特首辦主任嘅領導同謀略，「攞命陳」陳德霖已離開特首辦，唔知譚志源識唔識得吸取教訓呢？