本文重點
香港人成日投訴畀內地人爭飯碗，各行各業以致足球比賽都成為內地外援天下，估唔到將於十二月五日晚喺維港上演嘅東亞運開幕式，都被內地外援攻佔。東亞運籌委會主席霍震霆尋日出席新華書城荃灣旗艦店開幕禮，講起開幕式有乜神秘節目，佢話搵咗○八年京奧開幕式副總導演陳維亞擔大旗，又邀請曾參與京奧開幕嘅表演者「幫拖」，言下之意，即係將成個京奧開幕式「連人帶腦」搬嚟香港，希望將東亞運開幕式搞得有聲有色。
東亞運主辦單位一直表示要舉辦全球首個水上開幕式，最巴閉係設置一個堪稱史上最大嘅水中舞台，講到係威係勢。小霍承認開幕式唔衰得，所以無論燈光設計及音響效果都搵內地專家幫手，卓妮問佢會否搵香港民間團體表演，小霍就笑而不答。又難怪嘅，香港人未曾搞過呢類咁大型嘅開幕式表演，臨時拉夫咪盞獻醜。小霍話，開幕式預計花費三千萬元，一半政府承擔，一半由民間籌款。
小霍係東亞運「靈魂人物」，但開幕式當日佢唔會粉墨登場，而係負責招呼VIP嘉賓，已答應出席嘅包括佢啲中東元首好朋友及國際奧委會現任主席羅格，中國領導人亦會來港出席，但暫時未知邊個，僅招呼賓客都夠小霍忙到氣咳。
叫田少努力啲
旅發局主席田北俊早前話東亞運門券遲遲未到手，想向外推廣都難，小霍否認印飛印得慢，仲忍唔住暗寸田少話：「你叫佢（田少）努力啲喇！」但話口未完，小霍補番飛，話東亞運開幕當日正臨近聖誕節，如果田少加多兩錢肉緊推廣，應該可以吸引好多遊客喎。
卓妮