早前IQ博士同卓妮講，做得接班人必須符合三大準則：愛國愛港，事業上軌道，而且要有直選準備。中總會長蔡冠深話，IQ博士嘅建議好值得參考，不過中總人才濟濟，要慢慢協商，所以目前仲未有具體嘅人選喎。蔡冠深唔肯講自己嘅心水人選，只係好玄咁話：「年輕有年輕嘅好，年長嘅有經驗都唔差呀！」佢話目前仲未有人表態話想參選，要多啲時候醞釀人選。

三大熱門 三大原則

依目前走勢嚟睇，慈善家方潤華嘅兒子方文雄、全國政協委員黃英豪同港區全國人大廖長江三人最有潛力接棒。牛仔褲大王、中總副會長楊釗都睇好「佢哋係好人選之一」，而且與蔡冠深同一口徑，好同意IQ博士提出嘅三大原則；佢個人就特別睇重有參與直選準備呢一點。不過，楊釗話未有機會同三大熱門人選傾過，仲叫卓妮下次撞到三人要幫口問吓佢哋嘅意向。

中總嚟緊會同慈善團體搞一個名為千萬行籌款活動，目標要係一千萬元，籌得善款全數撥捐慈善機構。蔡冠深話，依家籌得三、四百萬元，距離目標仲有一段距離，話仍需努力喎。

卓妮