「你哋唔係都知嘅咩？」

茶敍本來預咗四十五分鐘，周錫瑋仲脫下早上着嘅西裝，以Ｔ恤牛仔褲出現顯親民。點知佢一開始就自爆畀現任特首、上任特首及未來參選嘅特首請食檸檬，大家自然咬住唔放；但周錫瑋似乎未察覺說漏嘴，仲反問：「你哋唔係都知嘅咩？」過多陣佢終於會過意，點都唔肯答，最後仲以趕飛機為由中途離開，茶敍比原定時間短咗成半。

周錫瑋口中未來參選嘅特首是誰呢？至今仍是個謎，等卓妮試吓拆解。周錫瑋原訂上星期五喺香港舉行嘅台北縣招商推介會上，同疑似下屆特首候選人熱門梁振英（CY）見面，可惜因為莫拉克而遲咗來，兩人緣慳一面，但CY當日臨走前都有同周錫瑋通過電話。我哋尋日都問過政府新聞處，佢哋話另一熱門嘅唐英年並冇同周錫瑋見面嘅行程。咁周縣長指嘅係邊個，大家應該心裏有數。

講番縣長嘅畫展，原來畫咗油畫近十年，今次展出嘅四十幾幅作品，全部色彩鮮艷，唔怪得連全國政協委員李大壯都話佢啲畫令人覺得好開朗啦！

卓妮