有冇聽過「青年創業計劃」呀？睇報紙雜誌，咪成日見到青年才俊創業興家，住洋樓，揸靚車，養番狗，睇嚟又好似幾易咁喎。

睇就易咯，所以喺政府不斷鼓勵年輕人創業之下，香港青年協會推出一個「青年創業計劃」，接受十八至三十五歲嘅青年申請，每個申請最高有十萬元免息貸款，估計每個業務可衍生四個職位空缺，可以實現以創業帶動就業嘅目標咁話喎。

呢嗱，最新一季共接獲一百一十二宗申請，比去年同期勁升兩倍，創下四年新高，當中近一成申請人為有大學學歷嘅待業青年，證明家陣愈嚟愈多人想創業過吓老闆癮。

計功夫茶話齋，青年人有大志創業唔係唔好，問題係商場如戰場，真係一將功成萬骨枯，依家畀青年人睇到嘅成功個案，萬中無一㗎咋。如果創業真係咁容易，係人都做老闆啦，邊度會有「打工仔」呢三個字呀？

事實上，由○五年至今，「青年創業計劃」一共批出六十九項業務申請，當中有三成衰咗，好多都係因為業務管理不善要執笠，創業唔成，仲孭到成身債，最後搞到要破產收場。

鬼咩，好多後生仔得鋪蠻勁同埋熱誠，唔知道佢哋屬於「三無」人士，即係無資金、無經驗以及無人際網絡。好多只係諗住無工做，霎時衝動就想做生意，以為創業好簡單，低估咗創業嘅難度。

有個大學生就清醒得多，佢啱啱喺校內攞咗社企創業比賽冠軍，但冇因此而飄飄然，又參加咗一個學做老闆嘅工作坊，諗住親自試吓點樣營運、存貨控制以及人事管理之類嘅工作。實踐出真知，呢個時候佢至知道，原來理想同現實差好遠。

咁就梗係啦，紙上談兵同上戰場打仗根本係兩回事。參加社企創業比賽寫計劃書容易，但當要落實嗰時，就知道好多細節要兼顧，非常繁複，絕對唔係想像中咁簡單。唔怪得呢位大學生話，畢業後寧願打工都唔肯做老闆。

其實政府猛咁鼓勵年輕人創業，你估真係咁好心咩？佢哋趷起條尾都知道發生乜事啦，只不過係為咗粉飾太平，拉低失業率，做靚盤就業數字之嘛。

弊在當局對經濟問題視而不見，對創造就業束手無策，一味只係叫人去創業，配套又唔足夠，結果浪費社會資源不特止，最慘嘅係幫人變咗害人，真係多得呢個政府唔少！