工程界立法會議員何鍾泰（Raymond）尋日去咗台北縣在港舉行嘅招商會，講開先知，原來Raymond成日去台北，但唔係去玩，而係帶團去考察。佢回憶上一次去台灣旅行，已經係七十年代嘅事，但旅行期間都另有任務在身，就係順便去視察台北榮民總醫院，幫手為呢間醫院做首期抗震設計。
早前有研究話廣東過多十至三十年可能發生強度較高嘅地震，Raymond話香港好多層數較少嘅建築物都有危險，好似學校、醫院、警局、消防局呢啲就最高危，事關呢啲建築物喺設計上都無考慮到防震，又唔同啲十幾層樓高嘅樓宇咁做到防風防震，所以如果香港一旦發生地震，首當其衝會倒塌嘅好可能就係呢類公共設施。
Raymond話，醫院、消防呢啲都屬於災難緊急救援設施，有起事上嚟都唔知點算，佢話同政府反映咗好耐，唔明點解相關部門到依家都無反應又無改進。Raymond話低層數建築物做防震都唔難，早前佢有份設計九龍塘火車站同葵青劇院，都加入防震設計，證明公共設施無防震係「不為也，非不能也」。