近日畀班考生狂鬧嘅香港考試及評核局，尋日又有新動向。政府公布委任人力資源顧問吳克儉做主席，任期三年，代替月底卸任嘅顧爾言，莫非想以吳克儉嘅專業，整頓考評局？不過，吳克儉去年已經係考評局委員，今年考評局嘅表現似乎都無咩進步喎，睇嚟吳克儉要再加把勁先得喇！
講起吳克儉，佢本身都係公職王，除咗考評局之外，仲係香港教育學院校董會副主席，又兼任房屋委員會同方便營商諮詢委員會成員，之前又做過紀律人員薪俸及服務條件常務委員會委員，今次再畀政府委任，隨時畀人覺得政府只係識得搵番啲自己友幫手。
其實吳克儉做房委會委員時，已經畀人批評佢成日潛水，好似喺○七／○八年度嘅五次房委會大會中，吳克儉只出席咗一次，但最後政府仍然將佢嘅任期續任到二○一○年三月卅一日，當時已惹來非議，希望呢位潛水王唔好再潛水，落力搞好考評局，等每年十幾萬考生可以放心考試。