中大與微軟亞洲研究院共同成立嘅「利群」重點實驗室尋日舉行揭幕典禮，教育局副局長陳維安都係主禮嘉賓。陳維安本身係普林斯頓大學嘅機電工程理學士兼哈佛大學應用數學碩士，而主力研發計算和用戶介面技術嘅「利群」，就開正佢嗰瓣，所以佢參觀實驗室嘅科研作品時都格外留心聽研究員講解。
陳維安係外國名牌大學畢業生，但尋日參觀完中大博士生嘅作品後竟然自嘲話：「我喺大學嘅研究和作品已經不能與今日嘅比較。人老了，跟不上科技潮流了。」咁又係，陳維安畢業至今起碼都有十幾年，科技日新月異，唔到你唔認落後。尋日展出嘅有教育、醫療同視覺藝術等科研項目，陳維安就對一套語音合成及語言識別技術系統特別有興趣，佢話呢個系統能夠糾正用家嘅英語發音，對教學好有幫助。睇嚟佢做咗教育局副局長後，對如何提升教學水平都算上心。
陳維安提及嘅學習軟件係由中大工程學院副院長蒙美玲領導研發，用家跟隨「老師」朗讀後，發音錯誤嘅生字會以紅色標示出來，對糾正港式英文十分有效，蒙教授計劃將套軟件免費放上網，令更多人受惠。