泰國蘇梅島早幾日有架客機降落時滑出跑道，導致多人死傷，聽落都好嚇人，如果訂咗機票準備起程嘅旅客真係唔知去唔去好，但經常去蘇梅島度假嘅觀塘區議會主席陳振彬（Bunny）就冇有怕，尋日下午同家人如期出發去蘇梅島度假。Bunny話唔會擔心航空安全問題，事關出事客機主要因為天氣惡劣，仲話生死有命，如果驚就做多啲善事喎！
Bunny話，蘇梅島好多嘢玩，享受陽光與海灘外，仲可以食盡泰國以外嘅世界各地美食，好似意大利菜、法國菜等，應有盡有。Bunny尋日出發之前，先為觀塘區全城抗毒系列活動揭開序幕，他話時下年輕人吸毒情況好嚴重，所以全城抗毒刻不容緩，一定要帶出正確訊息畀青少年，吸毒不但犯法，而且對身體有害。
對於教育局局長孫明揚話學生有權拒絕驗毒，Bunny就話，學生私隱權問題只係行政措施，相信會有辦法解決，他希望大家不要再花費時間辯論私隱問題，應該盡快落實驗毒計劃。