本文重點
自由黨去年立法會選舉受挫，前主席田北俊辭去黨魁，只保持普通黨員身份，直到上月，田少低調重返自由黨核心，當選新一屆中委，情況來得頗為突然。自由黨內部消息透露，田少今次係應黨內高層邀請回歸坐鎮，極有可能做埋常委，理由好簡單，就係借助田少嘅江湖地位，維繫番班工商界黨員，尤其要凝聚紡織、工總同香港總商會成員嘅向心力，亦即係退黨「3L」林健鋒、梁君彥同梁劉柔芬嘅界別，睇嚟二○一二年立法會選舉，呢三個界別激戰難免。
做轎伕撐方國珊入局
自由黨上月底選中委，當選六十人名單之中，赫然出現田北俊個名，唔通田少磨拳擦掌，再戰江湖？非也！自由黨內部消息話，田少無意重返立法會，喺二○一二年只會扮演轎伕角色，喺新界東自由黨名單排第二，希望力保愛將方國珊入局，既然田少唔做議員，按黨規，亦無資格競逐黨魁，所以田少今次重返自由黨中常委，可以話純屬捱義氣，為自由黨補窿，箍實班工商界黨員。
紡織世家出身嘅田少，喺總商會、工總同紡織界最大票倉嘅紡織業聯會，淵源深厚，人脈盤根錯節，唔少業界更加因為田少而願意投身自由黨。可惜去年立法會選戰之後，田少淡出自由黨，緊接發生3L退黨另組經濟動力事件，呢三大界別同自由黨嘅關係又少一層黏力。早前，田少多次明示或暗示，希望3L回巢，但結局似係「神女有心，襄王無夢」，於是自由黨高層唔再被動，請田少回朝坐鎮，凝聚三大界別黨員嘅向心力。
自由黨中委每年開會一次，功能只係召開會員大會，田少要同工商界黨員交心，順理成章要做埋常委，每月聚頭一次，有呢番「媒人」工夫，先至做得到位；即係話，田少以後扮演自由黨協調部部長，至於重大政策取向，好似係咪支持最低工資，就全權由三名正、副主席主理，分工清晰。
不過，有政界人士分析，自由黨驚動田少出山，如此緊張凝聚總商會、工業總會同紡織界嘅黨員，睇嚟唔止係害怕流失黨員嘅內政變動咁簡單，當中或涉對外擴張嘅長遠部署，即係準備喺二○一二年立法會選舉中，重奪總商會、工總同紡織界議席。
林健鋒則唔肯評論田少重返自由黨，係咪自由黨想爭番總商會個位，只係話既然已經退出自由黨，自由黨嘅家事，佢唔回應嘞。