仲有唔夠一個禮拜就榮休嘅社署署長余志穩，近日忙於出席「餞行宴」。臨別在即，余志穩（Fisher）尋日連跑兩場，下午相約傳媒談為官三十年以來嘅心路歷程，晚上就出席社福界為佢舉行嘅大型歡送晚宴。余志穩坦言在退休前未能「坐正」感到失望，但都接受咗現實；佢喺數任內威水史時仲大爆內幕，話特區成立後首創嘅「大紫荊勳章」呢個名係佢諗嘅，佢仲好幽默話，希望他日子孫有機會攞呢個獎喎。原來真正嘅「大紫荊之父」，係余志穩至啱！
社聯、社協及社總尋晚喺金鐘明都酒樓設宴廿圍歡送佢，請埋余署長喺理大任職外務主任嘅千金余文蔚，社聯行政總裁方敏生、前社聯主席朱幼麟及立法會社福界議員張國柱都賞面到賀，社聯主席陳智思因事唔喺香港，缺席晚宴。賓客熱情餞行，爭住上前握手影相，余署長來者不拒，興奮如嫁女。
冇得坐正感失望
去晚宴之前，余志穩下午又同傳媒茶敍，期間仲爆料話，當年佢喺司長辦公室做行政署副署長，等於政府總部嘅打雜，記得九七年中，政府有人打電話畀佢，話政府想喺七月頒發勳章畀十幾人，要求佢幫手度個名，中英文都係聽落去都要「威」；佢度橋之際，無意中喺褲袋攞個硬幣出嚟，望到硬幣上有個紫荊，於是諗到不如叫「大紫荊勳章」啦，呢個名原來出自余志穩手筆。
不過，「大紫荊勳章」沒為佢帶來好運。佢話去年政府放榜公布高官升遷名單，這是佢退休前最後一次機會，結果都係未能「升正」，失望在所難免。失意官場，余志穩承認性格欠圓滑，每每撐得太行，佢坦言自己嘗試過改變，但性格始終難改變。外傳佢同發展局局長林鄭月娥不和係無職升關鍵，余署長否認其事，力撐同娥姐好老友，佢又補飛話：「政府晉升制度係公平嘅。」
難捨四張直背椅
卓妮問佢離任在即有乜最唔捨得？佢指一指辦公室內四張直背椅。原來佢任職工務局時已患有腰痛，升官後坐唔到大班櫈，惟有走去政府地牢左摷右摷，終於搵到幾張陳年直背椅，一坐就啱晒心水，每次調任，定必帶埋四張椅走。今次退休，佢最唔捨得呢四張椅，事關呢四張椅係政府公物，帶唔走嘞。
退休後，余志穩第一件事係同家人去一轉泰國旅行充充電，之後唔排除去中學或大學講學，分享公共行政學問及社福經驗，作育英才，但一句到底，唔會下海從商！
卓妮