之不過咁，大埔雅麗氏何妙齡那打素醫院會出現一個非常荒謬嘅場景，救護車衝鋒陷陣有路走，去到醫院居然英雄落難冇位泊！

咦，咪住先，救護車受到人人禮讓，基本上路路暢通，因為個個都知道救護人員爭分奪秒拯救生命，冇人會阻住地球轉，有乜理由去到醫院反而會此路不通？有乜理由醫院員工會阻頭阻勢黑心成咁？就係咁先至叫做荒謬吖嘛。

本報記者連日去到那打素醫院視察，發覺九個救護車專用車位長期被私家車佔用，鵲巢鳩佔嘅包括醫生、護士甚至係消防處職員。其中一位救護員咁樣講：「真係好過分，已經好多年，一直冇人敢出聲，估唔到啲醫生護士讀咁多書都係咁做！」

照計，醫生護士冇理由唔曉得阻礙白車救人可大可小㗎，會唔會係佢哋自己冇位泊車，所以飛象過河夾硬嚟？事實又唔係喎，醫院設有職員停車場，大把車位任泊，只不過遠少少之嘛。

記者又發現，連續幾日有一架開篷車泊喺救護車專用車位，擋風玻璃貼有消防處標誌，反映車主係消防處職員。大家都知啦，救護車隸屬於消防處，鵲巢鳩佔嗰位仁兄或者仁姐，實際上係欺負自己人！

以為已經夠荒謬喇啩，原來好戲在後頭。記者走去一嘢踢爆啦，向院方反映白車冇位泊嘅古怪現象，醫院係就係有行動呀，不過所謂行動激到你嘔血。那打素醫院派人清場，將所有閒雜車輛趕走，然後拉起膠帶，圍封救護車專用車位。咁即係點？即係話，閒雜車輛固然唔准泊，即使救護車，一樣冇得泊！

吖，講到呢度功夫茶開始有少少思疑，其實係咪救護員平時得罪咗醫院高層？如果唔係，一來當初冇理由縱容非法泊車，二來咯喎，經記者踢爆之後，冇理由整一劑玉石俱焚，你又冇得泊，我又冇得泊，人人一樣冇得泊。

你話係咪荒謬絕倫吖？救護車當初因為有人橫行霸道而冇位泊，家陣趕走惡霸嘞，照舊冇位泊。如果你從陰謀論諗諗，你可能會認為，哦，梗係有人耍陰招出蠱惑，白車無論如何都冇得泊吖嘛，咁就唔好投訴詐型喇，唔該你繼續容許惡霸非法泊車。

本來泊車呢啲事唔應該勞煩食衞局局長周一嶽，之不過咁，功夫茶比較細膽，怕阻礙救護車等於玩殘小市民，你敢肯定冇人因為白車冇位泊而枉死咩？所以，勞煩周局長親自過問一下，最好梗係將黑心醫院嘅惡霸掃地出門啦！