香港已經有普選時間表，青年團體亦與時並進，最近換咗領導層嘅香港青年聯會，新人事，新作風，最近增補會董，首次放權畀一千名會員，以一人一票形式，喺十三名候選者中揀出四人，今次係青聯十七年嚟首次行普選，點講都係一個突破。
青聯有一百二十個會董名額，行提名制度，會員想做會董，就要攞到上屆五個常務董事簽名支持，今年五月產生一百一十六名會董，最終互選出由陳仲尼（Rock）擔任主席，剩低嘅四個會董名額，要進行增補。按青聯傳統，增補人選，向來由主席說了算，不過，阿Rock自動放棄呢個特權，破天荒改行記名投票選舉，確保四名增補會董都係令班兄弟姐妹信服嘅好人選，投票期今日結束，據聞戰況激烈，富豪邱德根孫女邱詠麒好落力拉票，睇嚟青聯高層嚟緊又會多個富豪之後。
咪以為選舉傷和氣，其實啱啱相反。我哋打電話問阿Rock，佢話競逐增補會董嘅十三名候選人，都係會內兄弟姐妹，最後揀邊四個，最好都係由大家嚟決定；以選舉定勝負，勝負無尤，公平、公正唔使拗！