煲呔曾親疏有別、任人唯親，獲各黨派議員同民間團體公認為好官嘅社會福利署署長余志穩，做到退休都只能升到首長級第四級，反而後生佢足足十年、任內屢次爆出醜聞嘅康樂及文化事務署署長周達明，再過多十日就會升任屬於首長級第八級嘅發展局常秘，認真冇天理。最離譜嘅係佢連呢十日都唔能夠順利捱過，尋日又畀本報踢爆該署遺失大批孫中山先生嘅珍貴文物，臨升職都衰收尾。
記得去年赤柱冧樹壓死人，負責管理康文署樹木隊嘅周達明，事後竟然仲話「可以接受」，龜縮咗成半年先至肯認衰道歉。對於今次遺失文物醜聞，周達明重施故技，只派出副署長鍾嶺海面對傳媒質詢，自己就玩失蹤迴避問題。梗係喇，周達明九七前後喺財政司司長辦公室做過，當時嘅財政司司長就係煲呔曾，正所謂「朝中有人好辦事」，就算佢嚟緊十日衰多幾鑊，政府都唔會撤銷佢今次升職安排啦。最慘係即將接任康文署署長嘅現任新聞處處長馮程淑儀，一上任就要處理周達明剩落嘅蘇州屎，想早啲放工返屋企照顧細路都幾難囉！