台北縣官商代表團前日訪港，展開六日交流活動，點知颱風莫拉克打到台灣，縣長周錫瑋要喺當地坐鎮，臨時嚟唔到，台北縣經濟發展局長李斌要兼任團長。李局長上任半年，有九百幾樣嘢等緊佢做，當佢知道好多香港高官暑假都攞長假輕鬆吓，不知幾羨慕，話喺台灣做官，一星期要做足七日，廿四小時候命無停手，搞到無時間陪屋企人，連個女讀到大學幾年級都唔知喎。
忙還忙，李斌經常來港，一有機會就幫手推銷台北縣。佢自爆上周末先喺香港同全國政協委員李大壯（David）食完飯，一知道David有個朋友經常去日本浸溫泉，即刻向佢推薦台北縣嘅溫泉旅館。李斌話喺香港飛去台灣，搭車去溫泉旅館再浸多兩個鐘溫泉，前後不過五六個鐘；如果去日本浸，分分鐘連溫泉門口都未到，所以去台灣最啱分秒必爭嘅香港人。
講到台北，李局長不停口，話台北縣有好多景點值得香港人去，好似九份、淡水、原住民部落等；又大讚台灣美食，話中國菜、日本菜同海鮮都好食過香港；但講到廣東菜，佢都話得香港先夠地道！