CY咁頻撲都係想「我撐人人，人人撐我」，勢估唔到佢咁全面，連o靚模嗰一票都掃埋。記得早兩日前行會成員周梁淑怡同公文袋黨魁余若薇仲喺度批評o靚模賣弄身體，言猶在耳，CY話佢都有留意o靚模現象，但就覺得香港係多元化社會，要禁止客觀存在嘅o靚模係不切實際嘅做法。佢仲力撐o靚模，話o靚模都係正當職業，如果係某啲問題上對青少年有不良影響，我哋應該疏導，例如介紹啲好書畀佢哋睇。

其實CY唔止撐o靚模，就連去年換屆以來經常同特區政府撐到行嘅自由黨，佢都一樣撐。記得CY早前出席咗民主黨十五周年黨慶晚會，又去咗公文袋黎廣德牽頭嘅專業聯盟哈利波特電影慈善籌款，嚟緊星期六CY又答應出席自由黨搞嘅「書中自有黃金屋送書券暨發布儀式」，同自由黨方剛及一班學生分享閱讀經驗。不過佢八月中會同家人去絲綢之路旅行，等大家都抖抖。

唔敢參考奧巴馬？

講開又講，港大七月份嘅民意調查顯示，CY嘅民望跌至個人新低，見到CY，梗係問吓佢點睇。CY有備而來話：「自己民望同行會成員都有下跌，但我嘅跌幅較其他同事少。」仲話唔會因此自滿。

CY繼續講，每個人都有自己嘅工作崗位，好似踢波都分前鋒、後衞同龍門。咁CY呢個成日冇得落場踢嘅大後備，有無諗過改踢前鋒參選下屆特首呢？CY答得好婉轉，話要睇社會需要，依家最緊要「守好自己崗位，做好自己本分」。

雖然CY之心可謂路人皆見，但當佢推介美國總統奧巴馬作品《Audacity of Hope》一書時，大家問佢奧巴馬有咩特質值得佢借鏡，佢即刻謙稱「唔敢、唔敢……」，足足講咗七次咁多。佢仲話，公職嘅嘢，唔係為個人同光宗耀祖，而係為社會。記得奧巴馬一開始選總統時唔係大熱，但後發先至，唔知CY又會係點呢？