本文重點
賭王何鴻燊與四太梁安琪嘅愛女超盈（Sabrina），過去每年放暑假返嚟香港，例牌四出吃喝玩樂同夜蒲，一直被視為反叛同貪玩一族，但原來呢位何家淑女正經起來真係可以好正經。卓妮記得超盈去年嘅暑期工係任職高院法官助理，今年佢都無偷懶，喺中環搵咗份寫字樓暑期工，一身OL Look打扮，同以前去蒲個樣真係判若兩人。
食晏期間 心事重重
燊哥身體抱恙入院治療，何家上下近日不斷出入醫院探望和照顧燊哥，超盈都有份去，但平時就如常返工。卓妮前日中午在歷山大廈Cova餐廳遇到超盈同一位男同事食午飯，見超盈化咗個淡妝，配清爽掛面髮型，再加一身典型黑白OL「制服」，襯埋對尖頭高跟鞋，似足行政人員。不過，超盈在食飯期間顯得心事重重，未知是否與爸爸賭王唔舒服入醫院有關。
講開又講，超盈嘅三房家姐超雲食飯鍾意AA制，但前日見超盈食完飯負責埋單，之後仲去幫男同事攞埋把長傘，一個人攞兩把遮完全無架子。本來卓妮諗住送埋超盈返公司，同佢傾多兩句，但佢就話唔使送。超盈變得咁生性，賭王同四太唔使擔心啦！
卓妮