證啟文超雲無拍拖

盛傳日前喺家中跌倒導致頭部受傷嘅燊哥，據聞前晚已經甦醒。卓妮尋日遇見Ian，Ian話，由於唔想喺呢個時候打擾何家，所以冇打電話畀燊哥嘅家人，亦唔知燊哥嘅情況，一切都係靠睇報紙。Ian透露，佢係澳門霍英東基金坐入澳娛嘅代表，每個月至少見燊哥一次，對上一次見燊哥喺六月底，見到燊哥精神唔錯，忽然聽到佢入院嘅消息，自己都有啲愕然，希望燊哥快啲出院，可以一齊去中華游樂會打網球，卓妮都喺度祝願燊哥早日康復！

提起燊哥，卓妮不忘問Ian幼子啟文同燊哥三房長女超雲嘅一段緋聞。Ian直言不諱，話以佢所知，啟文同超雲無拍拖，只係因為一齊喺英國讀書，玩得熟落，但Ian無閂死後門，補番一句：「講番轉頭，後生仔拍拖嘅嘢好正常，唔拍拖先至唔正常啦！」

前全國人大常委曾憲梓亦有現身展覽，曾老年前脊椎壓住神經，去年接受完手術，經過一年休養，尋日可以離開輪椅，站立主持展覽開幕儀式，港區全國人大代表譚惠珠一見佢老人家，就上前打招呼問好。曾老同Ian一樣，怕打擾燊哥家人，所以無打電話去何家問長問短，話自己曾經都大病過，知道病者最需要靜心休養，所以自己都識做。

卓妮