正處入伙高峰期的牛頭角上邨共有六座大廈，裝修工人與運載建築物料的手推車每日在各座不停穿梭，而各座樓層的電梯大堂則堆滿裝修廢料。有居民指出，曾目睹個別裝修承辦商為貪方便而隨便將廢料棄置，連同部分居民丟棄的廚餘及家居垃圾，各樓層頓成「垃圾崗」。入伙未幾的譚先生每日在垃圾堆中出入，大嘆無法忍受，「啲裝修廢料、垃圾堆晒喺口，有成半個人咁高，又臭又危險，明明交咗泥頭費畀房署，點解收咗錢唔清垃圾！」

建築廢料堆積如山，且佔去整個電梯大堂，居民出入俱一步一驚心。

黃小姐早前遭廢料堆中角鐵傷小腿，需縫上十三針。

本報接獲近廿宗投訴

影響環境衞生以外，垃圾崗更成為傷人陷阱。黃小姐日前便遭垃圾堆中的角鐵割傷小腿，即時血流如注，「入咗急症室，縫咗十三針，半個月返唔到工，真係無妄之災！」事實上，自牛頭角上邨開始入伙以來，本報已接獲近二十宗垃圾堆積投訴，反映問題嚴重。

當區區議員陳國華稱，近日不斷接獲升降機大堂堆積垃圾的投訴，「差唔多日日都有（投訴），啲居民由下邨搬去上邨都係想改善環境，依家仲差過未搬！」陳促管理公司加派人手清潔，改善惡劣環境。

劉先生：「單位好近位，搬咗入嚟兩個星期，啲垃圾都冇郁過，仲愈堆愈高，臭得好緊要，搞到我哋平時都唔敢開門！」

周女士：「我哋畀晒泥頭費，應該將啲泥頭搬落去地下環保斗，但啲冇公德心嘅人將泥頭堆晒喺口，搞到污糟晒！」

懶清廢料 泥頭費照收

「好多時都係啲裝修工人將垃圾擺喺屋外面，其他人就有樣學樣，搞到問題愈嚟愈嚴重！」公屋聯會主席王坤狠批房署監管不力，認為房署應加強刑罰，以收阻嚇之效，「唔單止要罰住戶，如果啲裝修工人屢勸不改，可以唔畀佢哋入邨做嘢！」

牛頭角上邨物業服務辦事處發言人表示，泥頭費乃房署按單位面積向新入伙住戶徵收，費用由一百七十六元至五百四十五元不等。現已額外增聘十多名清潔工人，每日於各樓層加快清理裝修廢料，並加派保安員巡查，倘住戶或裝修工人將廢料隨處棄置而屢勸無效，會向戶主發信警告，住戶並可被扣五分，而胡亂棄置垃圾者，亦可被判罰一千五百元定額罰款。發言人續稱，截至七月三十日，共向四十名住戶發出口頭警告，但暫時未有住戶接獲書面警告或遭扣分。

記者 梁少儀