跳蝨之所以跳得咁勁，係出於生理需要，因為跳蝨要神出鬼沒偷襲其他動物，包括人類。簡單咁講，動物世界嘅跳高冠軍要跳來跳去吸你血！

跳蝨吸血已經得人驚，更加恐怖嘅係，假如咬你嗰一隻係來自老鼠嘅鼠蝨，你大鑊嘞，你有機會染上鼠疫。內地青海省最近先至爆發肺鼠疫，死亡數目增加至三人，問你怕未？

講咗咁耐，功夫茶主要係想提提大家，上酒樓歎一盅兩件嘅時候最好小心啲，因為香港唔少酒樓為咗節省成本，唔係經常做滅蝨工作，地氈暗藏大量跳蝨，隨時空群而出飛擒大咬！

大家可能會話，如果上酒樓畀跳蝨咬到一撻二撻，一定會去食環署投訴，釘死佢！假如閣下真係咁諗，功夫茶勸你慳番都得嘞，事關曾經有酒樓員工向食環署投訴蝨患，署方竟然以「舉證困難」作為藉口闊佬懶理。所以話啫，你向食環署投訴，等於問和尚借梳，更加等於向木頭唱歌。

話時話，乜嘢叫做肺鼠疫？原來鼠疫分幾種，有腺鼠疫，有敗血性鼠疫，有肺鼠疫等等。而咁多種鼠疫之中，以肺鼠疫最殺人如麻，因為係透過空氣傳染嘅，即係你唔覺意同一個肺鼠疫病人閒話家常吹吹水，你可能已經中招。至於死亡率咯喎，肺鼠疫高達百分之九十五！

由於肺鼠疫可以人傳人，死亡率又高到離鬼晒大譜，所以青海省疫區全鎮一萬人要緊急隔離。相對嚟講，香港隔離一座酒店對抗豬流感其實濕濕碎。

明白未？一隻小小嘅跳蝨可以係一場大大嘅災難，食環署對於蝨患懶懶閒，冇人夠膽保證香港唔會出現鼠疫，甚至係最攞命嘅肺鼠疫。萬一Touch Wood講句，香港淪為肺鼠疫疫區，香港同胞世衞總幹事陳馮富珍下令隔離成個香港，咁就真係尷尬死咯。

為咗了解食環署有乜嘢方法對付吸血跳蝨，本報記者嘗試以酒樓食客身份致電投訴，你估有乜反應吖嗱？接聽電話嘅職員講到明，即使派人巡查，食環署只會視察老鼠同埋曱甴，係唔會理跳蝨嘅。

呢鋪真係死火嘞，功夫茶愈講愈心寒。你知啦，人類同鼠疫搏鬥咗幾千年，幾乎餐餐都係捱打。歐洲中世紀嗰一場黑死病，大大話話殺咗幾千萬人。二十世紀初嘅香港，亦有二萬人死於鼠疫。你話豬流感恐怖咩？鼠疫比豬流感不知恐怖幾多倍！

計功夫茶話齋，既然官僚到極嘅食環署漠視蝨患懶防鼠疫，咁就要曾蔭權親自出馬嘞。煲呔曾上教堂做彌撒嘅時候記住祈求天主保佑，青海省一定要生生性性做好隔離措施，唔好畀肺鼠疫蔓延開去，如果唔係，不設防嘅香港好大劑！