新鹹蟲是一名首席環保主任，早前被揭發的舊鹹蟲則是助理署長，兩人是上司與下屬的關係。孟子說：「上下交征利，而國危矣！」一眾o靚模，拋胸露腿，則「上下交爭露，而市旺矣！」如今，上司下屬爭相上鹹網，藍天危矣！

香港的雨水難怪特別有味！老朽即使停車熄匙、用購物袋，依足環境局局長邱騰華的指示做個環保好學生，然而，你班環保高官，上下班閱盡人間春色就話壓力大！唔怪之得，搞來搞去，香港的天空咁鬼多色！

老朽讀書時，老師成日話懶散是萬惡之母，甚至是貧窮嘅根源，又舉富蘭克林在其《致富之道》一文所說，警告世人千萬懶不得，一懶就會與窮困結緣。所以話「盡信書不如無書」，環保署兩位鹹蟲兄弟話畀大家知，懶散冇問題，調職薪照出！據公務員事務局表示，該名助理署長已被調離環保署，但當局仍未為他安排新的工作崗位。此外，若展開紀律聆訊，會着令有關公務員停職，調查期間（分分鐘一年半載）可獲發全數薪酬。所以話，打政府工始終係優質生活嘅保證！

有本書叫做《來生不做中國人》。如今中國崛起，據云「中國夢」已取代「美國夢」，來生不做中國人，肯定要捱薯皮。老朽已立下家訓給子子孫孫，來生必做中國人！下世必打政府工！你睇！就算唔食環保飯，打康文署工，行一分鐘去公廁都嫌煩，要整個私家坐廁才過癮！