曾自封「香港故事」嘅房協主席楊家聲，年初出咗本書《打工打不死》，教人就業致勝之道，反映他永不放棄嘅做人態度。尋日中學會考放榜，楊家聲又以這種「打不死」精神勉勵會考生，強調一次會考並非定生死，縱使考得唔好，只要積極努力，將來必定可以捲土重來取得成功。
楊家聲話曾經見過有未能升學嘅會考生創業開餅店，經營得相當成功，亦有會考生選擇工作吸取經驗，將來重返校園進修。記得楊家聲都說過，他自幼就好勤力讀書，中學考入皇仁書院，高考又考到入港大，但因為無錢讀大學而被迫選讀有津貼嘅師範學校，畢業後執教鞭十二年。
十二年漫長教學生涯沒有令楊家聲放棄，反而令他更積極，發憤到港大補讀學位，至今先後做過蜆殼、煤氣等多間大公司嘅高層，能夠有今日嘅地位，又係另一個獅子山下嘅香港故事。正如楊家聲所說，「打工打不死」，所以考試都唔會考死人，衰咗就再考過，只要有恒心，總有出頭天！