特區官場流傳，出身公務員系統嘅高官，同委任入局嘅問責官員，思維模式好唔同。其實，睇吓對乜嘢事情啫，好似講食經，「Ｄ姐」公務員事務局局長俞宗怡同商務及經濟發展局副局長蘇錦樑（Greg）就表現得好啱嘴形嘞，一樣鍾情街邊檔平民食肆。
Ｄ姐早前現身慈善舞台劇《蝶》首演，封口唔講紀律部隊調整薪酬爭議事件，話不如講飲講食。原來月入約三十萬元嘅Ｄ姐，對踎大牌檔呢種基層文化，一樣情有獨鍾，佢嘅「飛佛」之選，係北角渣華道街市上面嗰間「東寶」，大讚：「好好味！」Ｄ姐推介嘅呢間大牌檔，坐圓膠椅，吹大風扇，不過，一樣吸引到唔少中環OL遠道嚟幫襯，Ｄ姐都算識食。
講開食經，阿Greg亦係識途老馬，佢話老婆仔女都係印度菜嘅「粉絲」，耳濡目染下，自己呢兩年都上咗癮，最鍾意食印度烤餅，佢大讚灣仔修頓球場對面有間賣印度食物嘅小店，啲烤餅夠晒地道風味，無得彈，經朋友推介，一試難忘，以後經過灣仔，都心思思想幫襯咁話。聽完兩位高官咁講，證明好嘢有時真係「禾稈冚珍珠」㗎！