醫管局主席胡定旭尋日出席「台港論壇」時，大談加強兩地喺醫療同防疫方面嘅合作。由於論壇以普通話進行，所以肥胡都以「煲冬瓜」致詞，到咗問答環節，台下有人以廣東話發問，肥胡先改用廣東話回答。
不過，肥胡答完問題後，負責主持問答環節嘅亞太台商聯合總會總會長潘漢唐竟然問：「你在講廣東話還是普通話？」肥胡即時話自己講緊廣東話，結果畀潘漢唐揶揄：「胡主席講兩種語言都一樣流利，大家都分不出來了。」惹得哄堂大笑。
肥胡事後都自嘲普通話水平普通，但原來已經好過以前好多喇。佢憶述，九十年代曾有機會與中央領導人面談，佢笑言：「當時對方講乜嘢，我一句都聽唔明，總之人哋笑我就笑，大家舉杯我就飲酒。」最好笑嘅係，當時肥胡硬着頭皮用普通話與對方溝通，不過人哋就叫佢講番廣東話，肥胡當下好詫異咁問：「你聽得明廣東話？」點知對方竟然話，無論佢講普通話還是廣東話，大家一樣聽唔明，所以唔想肥胡講得咁辛苦喎，肥胡自嘲得嚟又幾搞笑喎。