本文重點
即將退休嘅社會福利署署長余志穩近期人氣爆燈，除咗不斷畀議員送高帽讚佢係絕種好官外，社福界龍頭香港社會服務聯會亦為佢搞歡送會，每人收費大概要三百元。群福婦女會主席廖銀鳳就話，幾百蚊食一餐雖然唔算貴，但佢哋嘅會員就唔係個個都畀得起，所以該會索性尋日自己搞個小型歡送會，由一班姊妹親手煮家鄉小菜答謝余志穩多年嘅照顧。
感謝積極處理家暴問題
開講有話，「物輕情義重」，余志穩前日接受訪問時都事先多謝群福婦女會嘅厚愛，尋日更禮尚往來捐咗一萬蚊畀該會作應急基金，又帶埋生果、朱古力做禮物，仲以「雨後彩虹」鼓勵一班受助婦女積極面對人生。
廖銀鳳大讚余志穩「有心、有耐性」，佢話上月余志穩親自了解家暴受害人嘅情況時，一聽就聽咗四個鐘，結果連午餐都唔記得食。事實上，余志穩上任後，積極處理家暴問題，有社署重案組之稱嘅保護家庭及兒童服務科更由五隊增加到十一隊。
群福婦女會嚟緊會約見余志穩嘅繼任人聶德權，廖銀鳳最希望新署長可以學似余志穩咁，「做唔到都盡力做，凡事行多步」。