添馬艦工程嘅承建商日前向城規會申請更改發展圖則，其中新立法會大樓嘅高座突然加高五層，旁邊一幅三角形空地更加多咗一幢足足有十層樓高嘅辦公大樓，但其實有關新建築只係大樓嘅未來擴建工程，大部分未有動工時間表。有環保團體就批評立法會咁做係「生人霸死地」，剝奪市民對每次擴建工程提出反對嘅權利。

面對質疑，Pauline尋日不得不企出嚟正視聽。佢話新大樓設計係可以用足五十年，早喺政府就整個添馬艦工程諮詢公眾時，已講明會有四期擴建計劃，最多可容納一百二十名議員同因此而增加嘅議員助理及秘書處職員，但承建商○七年向城規會申請批准時，冇一併交代該四期擴建計劃，負責監督工程嘅行政署亦冇提醒承建商補番。

劉秀成斥政府做漏嘢

直至立法會行政管理委員會研究需否加快擴建計劃時先發現問題，其中做過城規會副主席嘅建築界立法會議員劉秀成，就直斥政府做漏嘢，甚至有隱瞞城規會之嫌，因此立法會先要向城規會補交申請。

Pauline又透露，行政署喺規劃新政府總部嘅辦公室樓面面積時，一早預咗有一成後備空間，但立法會新大樓就完全冇預到。近年秘書處為配合議員工作請多咗人，就發現新大樓嘅地方唔夠用，被迫加快展開首期擴建工程，今次亦要一併交畀城規會批准；佢話如果唔係行管會發現得早，等到施工後期先要求加碼，工程費肯定又會大增，嘥公帑又唔環保。Pauline一再強調，今次事件係因為政府兩度漏招造成，立法會咁做只係幫政府補鑊，絕非偷雞臨時加碼霸地！

Pauline仲話，如果立法會今年底或明年初通過政改方案增加議席，新增嘅議員亦隨時會冇地方用，可能要將部分秘書處職員遷出新大樓，再嘥公帑租用附近嘅私人寫字樓辦公。不過今次究竟係政府唔小心漏招，定係心底裏已經預咗政改方案唔會通過到，就只有政府自己至知喇！