小霍周二忙裏偷閒，相約大公子霍啟剛去香港會食晏。兩仔爺都係大忙人，入場都要前後腳。下午兩點鐘，小霍由司機送抵香港會門口，隔咗幾分鐘，啟剛「步兵」而至會合爸爸。唔知係咪因為公務繁忙，小霍食飯都快過人，兩人飯敍唔夠一粒鐘就走人。

卓妮上前捉住小霍傾吓近況，講起大會取消部分東亞運項目，佢擰晒頭話可惜。不過話口未完就即刻補飛話，今屆東亞運有廿二個項目，係歷來最多嘅一屆喎。

生不逢時 缺乏支援

計卓妮話齋，項目多未必係好事，質素最緊要，可惜今屆東亞運動會生不逢時，撞正金融海嘯，政府孤寒閂水喉，民間又大叫「缺水」，喺缺乏支援下，呢個十足係燙手山芋，無人敢接，小霍肯頂硬上，都算抵得諗，難怪佢開到口希望民間畀多啲支持喎。

卓妮轉轉話題，問佢會否私人掏腰包，獎勵吓中國游泳隊喺今屆羅馬世界游泳錦標賽中勇奪多面金牌，小霍唔肯正面回答，笑騎騎話：「國家隊有好成績，大家都開心喇！」又難怪，小霍連自己個「東亞」攤檔都未搞掂，仲邊有心情「派糖」畀國家運動員呢？

卓妮