本文重點
城中掀起一片o靚模熱，立法會議員余若薇（Audrey）及自由黨周梁淑怡（莎姐）都唔執輸，尋日現身電台節目，即場接受形象改造兼行貓步。大會請嚟兩位曾參加展翅計劃嘅年輕人，各自用二百蚊為莎姐及Audrey設計新Look。設計師為Audrey搜羅一身深水埗衫裙及草帽，着慣名牌嘅佢竟然冇嫌棄，話著衫最緊要啱身，不論平貴。莎姐就換上一件釘上閃片嘅白恤衫及牛仔褲，但莎姐出動私伙Marc Jacobs平底鞋，伴隨音樂行貓步，台風絕不遜色。
唔畀三個女做o靚模
卓妮問莎姐及Audrey係咪想同o靚模爭飯食，Audrey自嘲無做模特兒潛質，對o靚模風氣更加抗拒，批評時下模似在賣弄性感多過做模特兒；如果家中三個女兒想做o靚模，佢一定唔畀喎。
莎姐亦奉勸時下少女專心讀書，毋須急於扮大人搵快錢。佢話，今屆書展畀o靚模攻陷，文化活動已經變質，所以行都費事行。尋日會考放榜，莎姐不忘勉勵畢業生，原來佢中學讀書成績亦麻麻哋，當年就讀名校聖保羅男女中學，身邊同學個個喺會考中考獲優等成績，自己就只得良級。後來莎姐發憤讀書，終於考取獎學金入讀港大英文系，爭番啖氣。
卓妮