唉，大澳真可憐，幾年前一場大火將好多棚屋毀於一旦，每逢打風又要擔心屋漏更兼逢夜雨。尤其可憐嘅係，大澳居民餐餐被搵笨，政府承諾呢樣、答應嗰樣，十居其九空口講白話。

呢嗱，遠嘅唔講嘞，淨係睇睇最近公布嘅大澳活化計劃，你就知道官場老千係幾咁大話連篇。即係咁，政府話預留六億改善大澳基建喎，仲會增加入口廣場、搭建棚屋探知館、復修鹽田同埋重置人手操作嘅橫水渡，用嚟發展生態旅遊，之但係，原有嘅棚屋木橋居然唔肯維修，你話係咪搵笨？

大澳棚屋嘅主要通道係一條接一條嘅木橋，經年累月，日曬雨淋，木橋已經變得霉霉爛爛，隨時有塌橋危機。正常嚟講，莫講話有一個活化計劃吖，即使冇，官老爺只要真係做到「民心我心」，早就應該出錢出力維修啦。弊就弊在，民政事務總署竟然以「資源有限」作為藉口，硬係闊佬懶理喎。

喂，乜維修木橋好貴嘅咩？貴得過年年幾千萬養肥一班隱形副局長？大拿拿預留六億攞去活化就有錢，正正經經為居民做少少事就冇錢，功夫茶打死都唔信囉。

唔好以為木橋失修係小事，更加唔好以為棚屋居民杞人憂天。事實上，舊年就有一位七十二歲李伯伯，行經木橋嘅時候，右腳唔小心踩到外露嘅鐵釘，跟住受到細菌感染，最終慘到要成隻黃金右腳切除！

一邊聲稱活化，一邊拒絕維修，政府係咪講大話吖？打個譬喻，你要為屋企裝修，冇理由淨係為外牆髹油就算，梗係連室內都要翻新㗎啦，如果你嘅裝修工程竟然唔包括更換發霉嘅地板，好明顯你極之有資格申請做公務員，假以時日應該有機會取代發展局局長林鄭月娥。

話時話，林鄭局長都幾搞笑，佢曾經喺立法會發展事務委員會咁樣講，活化大澳只係牽涉小量地區美化工程，唔會有大型基建。搞活化居然冇大型基建已經莫名其妙，即使係咁，功夫茶想問一問局長，維修木橋應該唔算大型基建啩，點解死都唔肯做？家陣有人因為木橋失修而斷咗隻腳，有冇必要美化一下？起碼導遊帶遊客參觀呢個東方威尼斯嘅時候，冇機會醜化香港吖嘛，因為導遊好可能口快快咁介紹：嗱，呢度就係大澳水鄉鼎鼎大名嘅「斷腳橋」！

不如咁啦，搵人捉阿林鄭入去棚屋過一晚，仲要逼佢赤腳行木橋，嚇到佢花容失色之後，大澳活化計劃先至有希望成為事實。咦，如果林鄭真係踩到鐵釘受傷要送去醫院咁點算？唔怕喎，曾蔭權御用直升機隨傳隨到。