尋日喺一個同青年們嘅對談會上，有青年問張建宗有冇試過失業，張建宗話未試過，不過當年讀大學時，佢唔申請做人工高、福利好嘅暑期工，反而選擇去工廠做雜工。不過雜工都有特定嘅要求，因為唔請大學生，張建宗於是扮中五畢業，以其baby face，瞞天過海。

張建宗話間廠做女士晚裝手袋，身為雜工嘅佢成日要加班，又要幫車衣女工買消夜，所以好明白何謂辛勞、剝削。後來因為佢表現好，上司仲想升佢職，不過佢都唔制，因為雜工有超時補水可以賺多啲。

正如張建宗所講，「一分耕耘，一分收穫」，佢做雜工都有兩大收穫，唔單只喺短短四個月內搵夠下一年嘅全年學費，仲令佢對女裝手袋好有認識。唔知張太買手袋時，局長有無幫吓眼呢？