臻美黃乾亨學校嘅辦學權爭奪戰已經曲終人散，身兼林大輝中學校監嘅林大輝佢尋日同傳媒茶敍時抱怨，學校花咗好多心血申辦臻美，冇諗過會連面試嘅機會都冇。佢哋下個星期會召開校董會檢討，之後會向教育局追查死因。

另一樣令大輝心裏有條刺嘅，就係佢喺立法會休會前最後一次答問大會嘅表現，當時佢質問煲呔曾有關內地港商稅務安排嘅問題，點知對方答話唔知佢講乜。佢悔恨自己當時唔識即場斥責煲呔曾唔關心業界，依家每日都帶住該段會議紀錄喺身，提醒自己以後發問，一定要有自信。

大輝又表示，早前有電視台記者唔止唔認得佢個樣，甚至佢噏埋個名對方都唔認識。佢猛問大家點樣可以提升知名度。

有記者講笑咁建議佢買番個G模攬枕博見報，佢就話唔會靠呢啲嘢，但係言詞間都流露出佢好羨慕啲G模，可以咁出名咁多人認識。