本文重點
回歸之後，政府每年都會喺七月一日頒發勳章表揚各界人士對社會嘅貢獻。香港中華總商會尋日就舉行咗個大型晚宴，祝賀今年獲頒大紫荊勳章，金、銀、銅紫荊星章同榮譽勳章嘅會董和會員。大紫荊勳章得主之一、快將退休嘅金融管理局總裁任志剛都有出席。
任總爭議聲中獲大紫荊
雷曼事件直接影響任總威信，所以佢今次獲頒授勳章，外界都有好大爭議，雷曼苦主甚至一度抗議政府頒呢個荷蘭水蓋畀任總添。不過任總尋晚就完全冇被外間早前嘅批評影響心情，一直笑容滿面。除咗任總之外，中總榮譽會長兼立法會商界代表黃宜弘、今年獲委任為太平紳士嘅立法會議員黃定光、中總前會長霍震寰等都有現身晚宴。
中總今年可謂大豐收，共有二十四個成員獲勳銜及獲委任為太平紳士，由九七年計起，中總其實已經有三百六十八個成員先後獲勳銜。中總會長蔡冠深就話，回歸以來已經有三百多個會員獲頒授勳章，證明中總成員長期服務社會嘅表現得到充分肯定，所以由該會創立嘅中華總商會愛心行動會繼續推動香港經濟及民生的發展。
卓妮