05/08/2009

播放本新聞相關短片

政情:余志穩退休搵工謝絕商界

前房屋及規劃地政局常任秘書長梁展文離職後接受新世界中國嘅聘書,結果搞到滿城風雨,立法會仲要成立專責小組調查當中有冇官商勾結。前車可鑑,依家高官退休後就職都格外小心,好似喺本月十四日正式告別官場嘅社會福利署署長余志穩尋日接受網上電台訪問時多次強調:「我肯定唔會加入商界!」

余志穩退休消息傳出後,各黨派嘅議員都爭住表揚佢,話佢係官場難得一見嘅好官。為咗保住「父母官」呢個金漆招牌,余志穩話打死都唔會好似梁展文咁從事一啲令政府尷尬嘅工作,佢早年曾經處理過舊區重建賠償方案,所以退休後唔會從商,更加唔會加入地產界,以免瓜田李下。

做咗社署署長兩年幾,余志穩自言退休後最想做義工,幫吓班弱勢社群。佢講到明自己會特別小心,喺退休後一年內,就連唔收錢做義工都要去一啲冇受社署資助嘅社福機構。

除此之外,本身擁有社會學博士學位嘅余志穩同唔少退休高官一樣,希望重返校園執教鞭。

劉慧卿:做到嘢嘅冇得升

官場「馬房文化」令唔少冇後台嘅好官宦海浮沉,升職無望,余志穩就係箇中典型例子。佢尋日無奈話,做咗公務員二十九年,深諳公務員制度嘅遊戲規則,署任兩年冇得「坐正」固然失望,但就唔會耿耿於懷喎。主持節目嘅立法會議員劉慧卿憤言:「做到嘢嘅冇得升,做唔到就攞金紫荊、做特首辦,政府有冇搵過你(余志穩)做特首辦吖!」

相對於卿姐嘅勞嘈,身為當事人嘅余志穩反而好豁達,佢笑言:「我做咗二十九年都冇人搵我,即係依家都唔會搵。」佢話,做得政府幕僚通常會先畀人搵去做司局長助理,所以有冇得升職其實早已有迹可尋。

離別在即,余志穩少不免講吓為官之道:「我唔會期望議員一定buy,只係希望議員明我哋做緊乜,真係抵鬧就鬧囉……乜派別都要去游說,唔會親疏有別。」正因為呢種實事求是嘅態度令佢贏盡掌聲,但試問一個用人唯親嘅政府又點容得下呢個唔講親疏有別嘅高官?

會考資訊一click即睇
詳情瀏覽on.cc《放榜無限分2009》

直擊人類豬流感最新疫情
詳情瀏覽on.cc《奪命流感》